L’ ÀQUA DÈLA VAL DÈI MORCC

[LEGGI LA STORIA E ASCOLTA L'AUDIO]

…’na matìna ‘l vèciu Pèdru l'è rüàa a ciamàm par rüà sü’ n dèla Val di Morcc.
Rüàa ilò àla Prìma Crus, sentìì cùsa 'l ma cuntàa sü: “Piscinèla ficùs, regòrdat che i noss vècc che i vàva 'n tèla Val dèi Morcc, rüàa chilò sùra a stu piatùn, sùta la Crus, i pundàva 'l gèrlu e i sa 'nginögiàva giù par di sü 'n Pàter Ave Gloria ei uràva 'l Signür de mìga fach ciapà sée de àqua, ma se mài apéna sèe de vìn, po i levàva sü 'n pè, i sa cargàva e i rampàva sénza tirà 'l fiàa fin àla segùnda Crus. Ilò i pundàva amò 'l gèrlu e i sa ‘ndrizzàva sùta la Crus uràndu de mìga fach ciapà sèe de àqua, ma par Grazia de Diu apéna sèe de vìn e pòo i cuntinüva ‘l viàcc !"
E mì, pü curiùs de ‘n scìmes gu dicc: “Pédru, che avv ghéruf che i pudéva mìga bév àqua e i pregàva Diu de tastà apèna vin?” “Tas ganivèl e scùlta 'n bot! Chéi iéra mìga margnàch e i séra 'l perìcul che i curéva. Tàa ghèe de savè, che chèl Prèvat dèla Val dèla Gànda, quèl stròlech che là cundanàa l’àva Celestìnai sü l’isula de Tèràda , l’éra ‘ndacc a sgurgugnà e a besulà ‘n tèla Val pròpi lì süra 'l Castelàsc. Chèl Prèvat, Dìu i l’éra cundanàa a l'infèran e giù gliò l’é 'n post che s’brüsa, tücc i ga sée de àqua per culmà l’arsüra e lüü l'éra trüàa 'n cìma àla val cun la sòo bachèta ‘na surgènt de àqua frègia e bùna par la sùa sée. Parò i noss avv, quànda i rüava ilò par bév e i sa tacàva àla canàl de rüsca tiràndu de brüt parchè l'éra bùna, i bevéva chèl’àqua frègia e i restàva ilò cùma pügnalàa giù par al stùmach e iscì prìma de murì i vedèva 'l Prèvat cantà e di sü mèsa e àla fin prìma de tirà i argàli, i la vedéva àa grignà de fa li pìchi.
Tüta la gént che capitàva ‘n di paràcc, i trüava tacàa àla canàl chìi por diàui che iéra beüü l'àqua, cun i öcc sbarlatàa fo e i déncc spacàa de mèz per 'l gélt.
Adès te capìì piscinèla rügasciòti parchè chèla Val i la ciàma la Val dèi Morcc.
Ma nòtri dùu de pericùi ma 'n cur mìga parchè apéna 'n rüa sü ilò, tiraròo fo 'l mè butìcc de vin e 'n bàrba al Prèvat déla Val, a buf a buf ma 'l tirarà igliò sèch e 'n canterà cun al fiàa chè 'l spüzza de vin e 'l Prevadàsc tüt rabbiùs ‘l sa maierà 'l so capelàsc négru.

Méngu

SE NON VISUALIZZI L'AUDIOCASSETTA CLICCA QUI